பூமியைத் தேடி...

இப்போதெல்லாம் ஏனோ பதிவுகள் எழுதவே தோன்றுவதில்லை. கிடைத்த இடைவெளியில் ஏதாவது வித்தியாசமாக முயற்சிக்கலாம் என்று ஒரு எண்ணம். உடனே அறிவியல் கலந்த தொடர்கதை ஒன்றை எழுதும் முயற்சியில் இறங்கிவிட்டேன். இப்போதுதான் முதல்முறையாக இவ்வளவு தூரம் சீரியசாக எழுதுகிறேன் என்று நினைக்கிறேன். வானியல் சம்பந்தப்பட்ட விஷயங்களுடன் கொஞ்சம் கற்பனையையும் கலந்து எழுதி இருக்கிறேன்.  கதை எந்த காலகட்டத்தில் நடக்கிறது என்று தனியாக குறிப்பிடவில்லை. ஆங்காங்கே அதுபற்றி சில குறிப்புகள் உள்ளன. டெக்னிகல் விஷயங்கள் புரியவில்லை என்றால் தயங்காமல் கேளுங்கள். நன்றி!

********

அமெரிக்காவின் லினியர் (LINEAR- Lincoln Near-Earth Asteroid Research) ஆய்வகத்தின் உயர்மட்ட மீட்டிங் அறை. அதன் இயக்குனர் மைக்கேல் க்ரெய்ட்டன் மீட்டிங்கிற்குத் தயாராக அமர்ந்திருந்தார். அருகில் அவரது உதவியாளரும், இரு சைன்டிஸ்ட்டுகளும் மீட்டிங் ஆரம்பிப்பதற்காக காத்திருந்தனர். அனைவர் முகத்திலும் ஒருவிதப் பதற்றம் தெரிந்தது. சரியாக மாலை ஐந்து மணி ஆனதும் த்ரீ டைமன்சனல் ஹோலோகிராம் ப்ரொஜெக்சன் மூலமாக அமெரிக்க ஜனாதிபதி ராபர்ட்சன் மீட்டிங் அறையில் வந்தமர்ந்தார். அதிமுக்கியத்துவம் வாய்ந்த ரகசிய மீட்டிங்குகள் இந்த முறையிலேயே நடத்தப்பட்டு வந்தன. பனிப்போர் உச்சகட்டத்தில் இருந்த போது நடத்தப்பட்ட ஸ்டார் வார்ஸ் திட்டத்திற்குப் பின் இப்போதுதான் இந்த மீட்டிங் கூட்டப்பட்டிருந்தது. 

TF5 என்ற விண்கல் ஒன்று திடீரென பூமியை நோக்கி படுவேகமாக வருவதாக லினியர் ஆய்வகத்தின் விண்கல் ஆராய்ச்சித்துறையினரால் கண்டறியப்பட்டு அமெரிக்க ஜனாதிபதி அலுவலகத்திற்கு அதிஅவசர அறிக்கை அனுப்பட்டதன் விளைவே இந்த உடனடி ரகசிய மீட்டிங். சுருக்கமான சம்பிரதாய விசாரிப்புகளுக்கு பின்னர் மீட்டிங் ஆரம்பித்தது.

மிஸ்டர் க்ரெய்ட்டன், TF5 விண்கல் பற்றிய தகவலை கூறுங்கள், நாம் சீக்கிரமே முடிவு எடுக்க வேண்டும் என்று  ராபர்ட்சன் பரபரத்தார்.

இயக்குனர் க்ரெய்ட்டன், மெல்ல செருமியபடி மெதுவாக பதில் சொல்ல ஆரம்பித்தார்.

ஜனாதிபதி அவர்களே முதலிலேயே கெட்ட செய்தி ஒன்றைக் கூறுவதற்கு வருந்துகிறேன். அந்த எரிகல்லை நம்மால் அழிக்க இயலாது என்று எங்கள் ஆய்வுகள் கூறுகின்றன.

ஹைட்ரஜன் குண்டுகளை வைத்து அந்த எரிகல்லை திசை திருப்பிவிடலாம் என்று கூறினீர்களே..?

ஆம் கூறினேன், ஆனால் நமது அட்வான்ஸ்டு ஸ்பேஸ் கொலிசன் சிமுலேசன் ப்ரோகிராம் (Advanced Space Collision Simulation Program) வேறுவிதமாகச் சொல்கிறது. நம்மால் ஹைட்ரஜன் குண்டுகளை வீசி அந்தக் கல்லை உடைத்துவிட முடியும். அந்தக் கல்லின் அதிக பட்ச விட்டம் 34 கிலோ மீட்டர்கள், அதன் வடிவம், வேகத்தை வைத்து கணக்கிடும் போது, அது 10 கிமீ, 8 கிமீ மற்றும் 16 கிமீ விட்டமுள்ள  மூன்று துண்டுகளாக உடையக் கூடும்,   அவற்றில் 10 மற்றும் 8 கிமீ கற்கள் பூமியை விட்டு விலகிச் சென்றுவிடும். ஆனால்,

ஆனால் என்ன மிஸ்டர் க்ரெய்ட்டன்...?

ஆனால், அந்த 16 கிமீ கல், சந்திரனில் சென்று மோதக் கூடிய வாய்ப்புகள் உள்ளதாகத் தெரிகிறது. நமது சிமுலேட்டர் அதற்கான வாய்ப்பு 80% மேல் இருப்பதாகக் கணித்திருக்கிறது.

நல்லதுதானே, அந்தக்கல் சந்திரனில் மோதினால் நமக்கென்ன வந்துவிடப்போகிறது?

அப்படி இல்லை ஜனாதிபதி அவர்களே, அந்தக் கல் சந்திரனில் மோதினால் சந்திரன் தன் பாதையில் இருந்து விலகி ஒரு லட்சம் கிலோமீட்டர்கள் பூமிக்கருகில் வந்துவிடக்கூடும். அதன் பின்னர் என்ன நடக்கும் என்பதை நினைத்துப் பார்க்கவே மிகுந்த அதிர்ச்சியாக இருக்கிறது....

க்ரெய்ட்டன் சொன்னதைக் கேட்டு அதிர்ச்சி அடைந்த ஜனாதிபதி ராபர்ட்சன், இப்போ என்ன செய்வது, வேறு எதுவும் செய்ய முடியாதா என்றார்.

ஒரு வழி இருக்கு சார். அது அந்த 16 கிமீ கல் மேல் இன்னொரு தாக்குதல் நடத்தி உடைக்கலாம். ஆனால் அதில் ரிஸ்க் அதிகம், அதற்கான சிமுலேசன் அனாலிசிஸ் இன்னும் தயாராகவில்லை.

மிஸ்டர் க்ரெய்ட்டன், அங்கே மாதவன் தானே சிமுலேசனில் வேலை செய்றார்? சென்ற முறை அவரை லாஸ் அலமாசில் சந்தித்த நினைவிருக்கிறது...

ஆமா, அவர்தான் இப்போ எங்க சிமுலேசன் துறைத்தலைவர்!

ஓகே, அவரையும் இந்த மீட்டிங்கிற்கு அழையுங்கள், நாம் இன்னும் 15 நிமிடத்தில் மறுபடி சந்திப்போம்.

மீட்டிங் தற்காலிகமாக முடிவுக்கு வந்தது. அனைவரும் இயல்பு நிலைக்கு வந்தார்கள். க்ரெய்ட்டன் இண்டர்காமில் மாதவனை உடனே வரும்படி அழைத்தார்.

மாதவன் மூன்றாம் தலைமுறை அமெரிக்க வாழ் இந்தியர். சிமுலேசன் ஸ்பெசலிஸ்ட். லாஸ் அலமாஸ் தேசிய ஆய்வகத்தில் (Los Alamos National Lab) இருந்த போது அட்வான்ஸ்டு நேசனல் மிசைல் டிஃபன்ஸ் திட்டத்தில் அவரது பங்களிப்பு கணிசமானது. சமீபத்தில்தான் லீனியர் ஆய்வகத்தில் இணைந்திருந்தார்.

மாதவன் வந்ததும் மறுபடி மீட்டிங் தொடங்கியது.

வாருங்கள் மாதவன், உங்கள் சிமுலேசன் எந்தளவு ஆகி இருக்கு? அதை பத்தி கொஞ்சம் சொல்லுங்க..

சார், நாம அந்த 16 கிமீ கல்லையும் உடைத்துவிடலாம். முதல் கட்ட சிமுலேசன்ல 90% வெற்றி கிடைக்க வாய்ப்பிருக்குன்னு தெரியுது, இன்னும் கன்பர்ம் பண்ணல, ஆனா....

தொடரும்...