பூமியைத் தேடி... (பாகம் 4)

முந்தைய பாகம் (பூமியைத் தேடி... பாகம் 3)

மாதவனிடம் இன்னும் ஒரு ஐடியா இருந்தது. ஆனால் அதை செயல்படுத்தும் அளவுக்கு தொழில்நுட்பம் இருக்காது என்று நினைத்தார். ஆனாலும் இப்போதைய சூழ்நிலையில் எல்லா வாய்ப்புகளையும் முயற்சி செய்துவிடுவது நல்லது என்று அதையும் க்ரெய்ட்டனிடம் சொல்லத் தொடங்கினார்.

”நாம் மல்டிப்பிள் அட்டாக் முறையை முயற்சி செய்து பார்க்கலாம் க்ரெய்ட்டன். அதாவது ஒரே நேரத்தில் மூன்று திசைகளில் இருந்து அக்கல்லை குறிப்பிட்ட இடங்களில் தாக்கலாம். அப்போது அது சுக்குநூறாய் உடைந்துவிடக்கூடும். ஆனால் தாக்குதல் டைமிங்கும், பொசிசனும் மிகத்தூல்லியமாக இருக்க வேண்டும். மேலும் சிமுலேசன் மூலமாக கல்லை எந்தெந்த இடங்களில் தாக்க வேண்டும் என்றும் கண்டறிய வேண்டும். அது மிகக் கடினமானது. ஆனால் இதற்கு அதிகபட்சமாக 35-40 குண்டுகள் வரை இருந்தாலே போதும்”

”இந்த ஐடியா நன்றாக இருக்கு மாதவன், எதுவுமே இல்லாமல் இருப்பதற்கு இதையாவது செயல்படுத்தி பார்க்கலாமே? நீங்கள் இதற்கான வேலையை உடனே ஆரம்பிங்க, உங்களுக்கு இது சம்பந்தமா வேறு உதவிகள் தேவையா?”

”எனக்கு அந்த கல்லின் அடர்த்தி, மற்றும் டிஸ்ட்ரிபியூசன் பத்திய விபரங்கள் உடனே வேணும்”

”ஓகே மாதவன், ஏற்கனவே இந்த வேலையை ஆரம்பிச்சுட்டாங்க, அதை துரிதப்படுத்த சொல்றேன். நீங்க நேரடியா அவங்ககிட்டயே விபரங்கள் வாங்கிக்குங்க. அப்புறம் இரவு ஜனாதிபதியுடனான மீட்டிங்ல பேசுறதுக்கு இதைப் பத்தி இன்னும் விபரங்கள் சேகரிச்சுக்குங்க”

எல்லாரும் மீட்டிங் அறையில் இருந்து அவரவர் இடங்களுக்கு திரும்பினார்கள். அதற்கிடையில் மற்ற நாடுகளிலும் போதுமான குண்டுகள் இல்லையென்ற தகவல் ஜனாதிபதி அலுவலகத்தில் இருந்து வந்தது, இருந்தாலும், மாற்றுத் திட்டம் தயாராகிக் கொண்டிருந்ததால், அந்தச் செய்தியை அவர்கள் பொருட்படுத்தவில்லை. ஜனாதிபதியுடன் இரவு மீட்டிங் மிக நீண்ட விவாதத்திற்குப் பின் முடிந்தது. 

அந்த விண்கல்லை மூன்று பக்கம் இருந்தும் தாக்க வேண்டும் என்று முடிவானது. மாதவன் சிமுலேசன் செய்து கொடுத்தவுடன் குண்டுகள் தாங்கிய ராக்கெட்டுகளை ஏவலாம் என்று திட்டமிடப்பட்டது. குண்டுகள் பொருத்தப்பட்ட ராக்கெட்டுகளை தயார் செய்து ஏவும் பொறுப்பை லாஸ் அலமாஸ் தேசிய ஆய்வகம் ஏற்றுக் கொண்டது. செவ்வாய் கிரகத்தில் அமைக்கப்பட்டு இயங்கி வரும் மார்ஸ் லேப்ஸ் சோதனைக் கூடத்திற்கு இதனை கண்காணிக்கும் பொறுப்பு வழங்கப்பட்டது. மாதவன் தனது சகாக்களுடன் சிமுலேசனில் மிகத்தீவிரமாக மூழ்கினார். 

நாம் அப்படியே லாஸ் அலமாஸ் தேசிய ஆய்வகத்தில் என்ன நடக்கிறது என்று பார்ப்போம். அங்கு இத்திட்டத்தின் ஆணிவேராகிய ராக்கெட் சிஸ்டங்களை துறையின் தலைவராக இருப்பவர் கணேஷ் என்ற இந்தியர். அவரே செவ்வாய் கிரகத்தில் சென்று இறங்கிய முதல் ராக்கெட்டின் வடிவமைப்பு டீமிற்கு தலைமைப் பொறியாளராக இருந்தவர். இப்போதும் அவர் செவ்வாயில் இருந்து இயங்கி வரும் மார்ஸ் லேபின் கோ-ஆர்டினேட்டராக இருந்து வருகிறார். 

இந்த புதிய விண்கல் பிரச்சனை அவரை மிகவும் பாதித்து இருந்தது. எதையாவது செய்து பூமியை காப்பாற்றிவிடலாம் என்று தீவிர யோசனையில் இருந்தவரை விண்கல் மீது தாக்குதல் நடத்தும் அணியில் பங்கேற்க அழைத்தார்கள். மிகுந்த உத்வேகத்துடன் மீட்டிங்கிலும் கலந்து கொண்டவரை மீட்டிங்கில் எடுக்கப்பட்ட முடிவுகள் கலவரப்படுத்தின.

விண்கல் மீது நடப்பத்தப்பட இருக்கும் மும்முனைத்தாக்குதல் திட்டத்திற்கு மிகுந்த துல்லியமான ராக்கெட்டுகள் தேவை. ராக்கெட்டின் பாதையில் அனுமதிக்க கூடிய அளவு பிழை எவ்வளவு இருக்கலாம் என்று இன்னும் முடிவாகவில்லை, மாதவன் தலைமையில் சிமுலேசன் டீம் அதை இன்னும் சில நாட்களில் கணக்கிட்டுவிடுவார்கள். அது இப்போதைய ராக்கெட்டுகளின் திறனைவிட மிக அதிகமாக இருந்துவிடுமோ என கணேஷ் அஞ்சினார்.

மாதவனிடம் இருந்து சிமுலேசன் கணக்கீடுகள் லாஸ் அலமாஸ் வந்து சேர்ந்தது. எதிர்பார்த்தது போலவே தாக்குதலுக்கு மிக அதிகமான துல்லியம் தேவையாக இருந்தது. இப்போது என்ன செய்வது....?

(தொடரும்...)