பூமியைத் தேடி... (பாகம் 3)

முந்தைய பாகம்: பூமியைத் தேடி... (பாகம் 2.....)

”இல்லை மோர்கன், யோசிப்போம், ஏதாவது முயற்சி செய்வோம், யோசியுங்கள். நாசாதானே பூமிக்கருகே வரக் கூடிய ஆபத்தான பொருள்களை ட்ராக் செய்து வருகிறது? ஆனா இந்தக் கல் உங்கள் ட்ராக்கிங்கில் வரவில்லையே, என்ன பிரச்சனை?” என்று சற்று எரிச்சல் அடைந்தவராய் கேட்டார் ஜனாதிபதி ராபர்ட்சன்.

”ஆக்சுவலா நானே அதைப் பற்றி பேசலாம்னு இருந்தேன். 2008-ம் வருடத்திலிருந்து நாசா பூமிக்கு அருகில் வரும் வாய்ப்பிருக்கும் 140 மீட்டருக்கு அதிகமான சைஸ் உள்ள கற்களை கண்டறிந்து ட்ராக் செய்து வருகின்றது. அந்த லிஸ்ட்டிங்கில் இந்த 34 கிமீ கல் இல்லவே இல்லை. மேலும் 2 நாளுக்கு முன்பு வரைகூட எங்கள் ஆப்சர்வேசனில் இது வரவில்லை. ஆனால் இப்போது இது பூமியை நோக்கி வந்து கொண்டிருக்கிறது, அதுவும் அதன் இயல்பான வேகத்தை விட அதிகமாய். இது எங்களுக்கு உண்மையிலேயே விளங்கவில்லை. க்ரெய்ட்டன் நீங்க என்ன சொல்றீங்க?”

”ஆமா மோர்கன், நாங்களும் அதைக் கவனித்தோம், அதன் வேகம் இயல்பைவிட அதிகமா இருக்கு, அது 2 நாட்கள் முன்பு வரை இந்தப் பாதையிலேயே இல்லை. லினியரில் இருந்து நாங்கள் நாசாவிற்கு இதுபற்றி தகவல் அனுப்பி இருக்கிறோம். இனி ஸ்பேஸ்கார்ட் (Spaceguard) சிஸ்டத்திற்கு அலர்ட் அனுப்ப வேண்டும், அதை நீங்கள்தான் செய்ய வேண்டும்”

”மோர்கன் ஸ்பேஸ்கார்ட் சிஸ்டத்தை அலர்ட் செய்ய வேண்டாம், அப்புறம் உலகநாடுகளுக்கும், மக்களுக்கும் நம்மால் பதில் சொல்ல முடியாது,  முதலில் என்ன செய்யலாம்னு முடிவு செய்து கொள்வோம். இன்னேரம், ஐரோப்பா, சீனா, இந்தியாவிலிருந்து இந்தக் கல் பத்தின தகவல் வந்திருக்குமே?”

”ஆமா, இந்தியா ஸ்பேஸ்கார்ட் சிஸ்டத்திற்கு நேரடி அலர்ட் அனுப்பி இருக்கிறது, ஆனால் அவர்கள் இன்னும் தகவலை பிரஸ்சிற்கு வெளியிடவில்லை. ஐரோப்பிய யூனியன் ஸ்பேஸ்கார்ட் உறுப்பினராக இருப்பதால் அவர்கள் தனி அலர்ட் எதுவும் அனுப்பவில்லை. சீனாவிடம் இருந்து எந்த தகவலும் இல்லை மிஸ்டர் ராபர்ட்சன்”

”நல்லதாப்போச்சு, தகவலை இப்போதைக்கு வெளியிட வேண்டாம்னு இந்தியாவிற்கு ஒரு அறிவுறுத்தல் அனுப்புங்க. சீனா ஸ்பேஸ்கார்ட் சிஸ்டத்தில் மெம்பர் கிடையாது, அதனால் அனுப்பலைன்னு நினைக்கிறேன். மோர்கன் உங்கள் தலைமையில் ஒரு டீம் உருவாக்குங்கள், யார் வேணுமோ அழைத்துக் கொள்ளுங்கள், அனைத்து சோர்சுகளையும் பயன்படுத்திக் கொள்ளுங்கள், இன்று இரவு 10 மணிக்கு மீண்டும் மீட்டிங்கில் சந்திப்போம், அப்போது எனக்கு ஒரு நல்ல செய்தி சொல்வீர்கள்னு நம்புறேன்” என்றவாறு ராபர்ட்சன் விடைபெற்றுக் கொண்டார். 10 மணிக்கு இன்னும் சிலமணி நேரங்களே இருந்தன.

சிறிதுநேர அமைதிக்குப்பின் மோர்கன் மீட்டிங்கை தொடர்ந்தார்.

”கிரெய்ட்டன், உங்கள் அனைத்து துறைத் தலைவர்களுடன் அடுத்த மீட்டிங்கிற்கு தயாராகுங்கள், இன்னும் 1 மணிநேரத்தில் நாம் அடுத்த மீட்டிங்கில் இணைவோம், நான் லாஸ் அலமாஸ் இயக்குனரையும் அவர்கள் டீமையும் மீட்டிங்கில் இணைக்கச் சொல்கிறேன், அவர்கள் தான் நியூக்ளியர் வார்ஹெட்ஸ் (Nuclear Warheads) ப்ரோகிராமை ஹேண்டில் செய்யக் கூடியவர்கள். நாம் எல்லா சாத்தியக் கூறுகளையும் முழுமையாக ஆராய வேண்டும். இத்தோடு இந்த மீட்டிங்கை முடித்துக் கொள்வோம். மீண்டும் சந்திப்போம். நன்றி”

ப்ரொஜெக்டர்கள் அணைந்தன. மீட்டிங்கும் முடிவுக்கு வந்தது. க்ரெய்ட்டனும், மாதவனும் யோசனையோடு அமைதியாக அமர்ந்திருந்தார்கள். மாதவன் ஏதோ ஒரு முடிவுக்கு வந்தவராக,

”க்ரெய்ட்டன், மற்ற நாடுகளில் எவ்வளவு நியூக்ளியர் வெப்பன்ஸ் இருக்குன்னு தெரிஞ்சுக்க முடியுமா? இந்த இக்கட்டான சூழ்நிலையில அவங்க உதவுவாங்கன்னு நினைக்கிறேன்”

”ம்ம், சரிதான் இது எல்லாருக்குமான பிரச்சனைதானே. அவர்களும் உதவலாமே? நான் உடனே ஜனாதிபதி அலுவலகத்திற்கு தொடர்பு கொண்டு இந்த தகவலை பெற முயற்சிக்கிறேன். செக்ரட்டரி, உடனே ஜனாதிபதி அலுவலகத்திற்கு கால் பண்ணுங்க”

க்ரெய்ட்டன் ஜனாதிபதி அலுவலகத்திற்கு தகவலைச் சொன்னார். அது மிகவும் ரகசியமாக வைக்கப்பட்டிருக்கும் தகவல் வகையைச் சேர்ந்ததால்,  சற்று நேரத்தில் ஜனாதிபதியே நேரடியாகச் சொல்வார் என்று கூறிவிட்டார்கள்.

”மாதவன், இன்னும் கொஞ்ச நேரத்துல அதுபற்றி விபரம் கிடைக்கும், ஆனா எனக்கு நம்பிக்கை இல்லை. ஏன்னா எல்லா அணு ஆயுத நாடுகளும் ஒப்பந்தத்துல கையெழுத்துப் போட்டு அவங்க அணு ஆயுதங்களை அழிச்சுட்டாங்க. இப்போ எங்கேயுமே அணு ஆயுதம் தயாரிக்க உதவும் ரியாக்டர்கள் கூட இல்லை. ஏன் மின்சாரத்திற்காக பயன்படுத்தப்படும் அணு உலைகள் கூட நிறுத்தப்பட்டு பல வருடங்கள் ஆகின்றதே?”

”நீங்க சொல்றது சரிதான் க்ரெய்ட்டன். இருந்தாலும் இப்போ நம்மகிட்ட ரகசியமா 50 குண்டுகள் இல்லையா? அதுமாதிரி கண்டிப்பா இன்னும் சில நாடுகள் வெச்சிருப்பாங்கன்னு நினைக்கிறேன்”

”இருக்கலாம் ஆனா நமக்குத் தேவையான 200 குண்டுகள் கிடைக்குமா? நம்மகிட்டயே 50 தான் இருக்கு, மத்த நாடுகள்ல நிச்சயமா அதைவிட குறைவாத்தான் இருக்கும்”

”இல்லை க்ரெய்ட்டன், இன்னும் குறைவான குண்டுகளை பயன்படுத்தி அக்கல்லை அழிக்க ஒரு வழி இருக்கிறது. ஆனால் அது சிமுலேசன் செய்யவே மிக மிகக் கடினமானது. அதைச் செயல்படுத்துவதற்கும் மிக மிகத் துல்லியமான சிஸ்டங்கள் தேவை”

”அது என்ன வழி  மாதவன்..? ”

(தொடரும்...)

.